Shqipëria një hap larg prodhimit të Bombës Bërthamore! -Satirë nga E. Kaceli

Të dashur qytetarë, bëni mirë të kapeni fort pas karrigeve, të kontrolloni bunkerët e vjetër të Enver Hoxhës, në pastë mbetur ndonjë pa u prishur; të blini ndonjë pako jod shtesë në farmacinë më të afërt. Jo se ka ndodhur ndonjë krizë e re në Lindjen e Mesme apo se Kim Jong-un ka vendosur të hapë një degë të programit të tij bërthamor në Ballkan, por sepse në horizont lëviz gjithmonë një rrezik shumë më i madh: krijimtaria e pakufishme e Edi Ramës.

Mendonim se e kishim parë gjithçka. Kemi parë fasada me ngjyra pastel që fshijnë mjerimin, kemi parë korridore digjitale ku çdo gjë zgjidhet me një klikim në e-Albania, kemi parë shatërvanë që kërcejnë dhe stadiume që kushtojnë sa gjysma e Buxhetit të Shtetit. Kemi duruar koncesione, inceneratorë që punojnë vetëm në dimensionin paralel, dhe rilindje urbane që lulëzojnë më shpejt se lulet në pranverë.

Por, duke njohur ambicien e pakufishme të kryeministrit për të hyrë në histori jo thjesht si kryeministër, por si një lloj faraoni modern i Ballkanit Perëndimor, pyetja që duhet t'i bëjmë vetes me frikë është: Po sikur t'i teket?

Imagjinoni vetëm skenën. Një mëngjes, gjatë një prej llomotitjeve të tij artistike në Facebook apo në ndonjë podcast ku flet me veten, Rama shpall me atë tonin e përgjumur por filozofik: "Miq, Shqipëria nuk mund të mbetet peng e teknologjive konvencionale. Ne jemi vendi i Skënderbeut, i Ismail Qemalit, dhe tani… i uraniumit të pasuruar në Surrel."

Dhe menjëherë nisin punimet. Angazhohet parlamenti, qeveria dhe patronazhistët!

Krijohet menjëherë "Ministria e Rilindjes Atomike dhe e Estetikës Bërthamore", e cila do të drejtohej nga ndonjë arkitekt italian me origjinë pellazge, që nuk ka lidhje me fizikën bërthamore, por që di të vizatojë reaktorë në formë lulesh.

Puna për ndërtimin e centralit bërthamor do t'i jepej një kompanie offshore me kapital zero euro, të regjistruar në ndonjë ishull ekzotik, por që fiton çdo tender sepse është e vetmja që kupton Vizionin e Madh.

Për të mbrojtur veten nga sulmet e Bashkimit Evropian, do të na thuhej se kjo armë bërthamore nuk është për të sulmuar askënd, por është thjesht një "instalim artistik ndërkombëtar" për të tërhequr turizmin e lartë të nivelit Turizëm Bërthamor! -dhe për t'i treguar botës se Shqipëria nuk fshihet më pas gishtit të mesit!

E vërteta është se ne shqiptarët jemi mësuar me gjithçka. Kemi mbijetuar kalimit nga komunizmi te kapitalizmi i egër, nga piramidat financiare te gropat e gropëzimet e përhershme rrugore. Nëse Edi Rama vendos të ndërtojë bombën atomike, jini të sigurt se ajo ose do të vonohet për 20 vjet, ose do të përfundojë vetëm si një maket kartoni në Parkun e Liqenit, ku fëmijët bëjnë foto, ndërkohë që fondet e saj kanë përfunduar diku në ndonjë kullë me pamje nga deti.

Prandaj, le të lutemi sot, nesër dhe çdo ditë: Dashtë Zoti e Edi Ramës nuk i shkon ndërmend të prodhojë armën bërthamore. Sepse, po i shkoi ndërmend, i vetmi shpëtim do të jetë që reaktori të bllokohet nga ndonjë burokraci e çmendur e kadastrës shqiptare! Ose nga Revolucioni i Flamingove!

E. Kaceli

Blindat e shpuara të propagandës qeveritare nga E. Kaceli

 

Kur qeveria përpiqet të shesë një operacion montimi si një mrekulli të industrisë së rëndë ushtarake, qytetarët nuk vonojnë t'i përgjigjen me armën më të fortë që kanë: ironinë dhe memet në rrjetet sociale.
Sapo u hodh në qarkullim narrativa zyrtare për mjetet e kompanisë TIMAK – të krijuara në bashkëpunim me kompaninë shtetërore të mbrojtjes (KAYO) – interneti u mbush me batuta që tallnin "Made in Albania"! Shasitë, karroceritë dhe motorrët, e Toyota-s apo MAN-ët e gjermanit, na kujtuan të gjithëve se nga "Made in Albania" shpesh e vetmja gjë vendase ka ngelur vetëm logoja "TIMAK"! Por edhe ajo bashkë me shiritat inagurimit i marrim nga kinezi kioskave!

Ndërsa rrjetet sociale qeshin me këtë flluskë mediatike, pas fasadës fshihet një debat shumë më serioz rreth ekonomisë, propagandës dhe keqpërdorimit të institucioneve.
Nëse shikojmë me kujdes natyrën e këtyre mjeteve taktike, zbulojmë një të vërtetë krejtësisht ndryshe nga ajo që transmetojnë kronikat zyrtare. Shasia dhe motorët janë të huaj – zakonisht marka të njohura si Toyota apo MAN. Lëndët e para bazë, çeliku balistik dhe bojërat speciale nuk prodhohen në Shqipëri, pasi vendi nuk disponon një industri metalurgjike apo kimike ushtarake, madje s'ka industri hiç!
(Vetëm nëse qeveria llogarit turizmin si industri e rëndë!)
Në thelb, ajo që ndodh në terren është një proces mbivendosjeje: mbi një platformë tashmë të gatshme dhe të testuar ndërkombëtarisht, vendoset një superstrukturë, kryhet një montim i pjesëve të blinduara dhe integrohen pajisje shtesë. Ky aktivitet zhvillohet pikërisht në bashkëpunim me kompaninë shtetërore të mbrojtjes (KAYO), një strukturë përmes së cilës qeveria bëhet palë në këtë sipërmarrje.
Në këtë bashkëpunim publiko-privat mund të shohim thjeshtë një nismë legjitime biznesi. Por ka një hendek të madh midis realitetit teknik dhe mënyrës sesi ai shitet si një revolucion industrial.
Revolucioni industrial i qeverisë së rilindjes na sjell paralelizmin e së kaluarës kur Uzina e Autotraktorëve në Tiranë prodhonte të ashtuquajturin traktor "shqiptar" DT-54. Traktor që u ndez dy vetëm dy minuta!
Dallimi sot qëndron te fakti se ekonomia është e hapur dhe askush nuk pretendon zyrtarisht se çdo gjë prodhohet nga zeroja. Megjithatë, përdorimi i një kompanie shtetërore si mburojë për të legjitimuar dhe amplifikuar këtë narrativë tregon se si strukturat publike, e private, vihen shpesh në shërbim të marketingut politik. Problemi nuk është tek importimi i pjesëve – që është praktikë standarde globale – por tek keqpërdorimi i këtij partneriteti nga pushtetarët për të shitur një montim privat si një mrekulli të industrisë shtetërore të armatimit.
Marketingu politik shfrytëzon dëshirën e qytetarëve për të parë vendin e tyre të zhvilluar, duke na ofruar një kompani private dhe bashkëpunimet e saj zyrtare si një super-fuqi industriale. Kjo lloj retorike shërben për të krijuar perceptime artificiale të rritjes ekonomike dhe për të prodhuar tituj lajmesh që të tërheqin vëmendjen, duke lënë në hije problemet reale strukturore të ekonomisë shqiptare.
Për sa kohë që politika përdor ndërmarrjet dhe prodhimin ushtarak si një mjet për spektakël mediatik, opinioni publik mbetet i ushqyer me iluzione – ndërkohë që rrjetet sociale vazhdojnë të prodhojnë meme. 

Një shoqëri normale ka nevojë për transparencë dhe për një vlerësim realist të aftësive tona industriale, duke ndarë suksesin real të një sipërmarrjeje nga mitologjia e rreme e pushtetarëve. Dhe jo përralla me mjete të blinduara për gjithë botën, me satelitë, me flota ajore civile, me fabrika dronësh, e të tjerë, e të tjerë...
E. Kaceli

Parti Zezanë dhe Ballistë! nga Edmond Kaceli, Itali

- Nga një që ka pasë edhe kulakë edhe ushtarë -partizanë të vërtetë,  në fisin e tij.

Kur Kryeministri EdVer Rama, flet për kundërshtarët politikë me gjuhën e Shefqet MutSarajt, duke i ndarë shqiptarët në partizanë e ballistë ky vend, Shqipëria, jo vetëm ka prekur fundin por është vend, mbase, i pashpresë!
Gjuha e urrejtjes dhe e mllefit, tipike për njerëzit që s'kanë fisnikërinë minimale në gjakun e tyre bastard, ka qëllim veç të përçajë e të vijojë sundimin! Se në fakt Kryeministrit Edi Rama nuk i intereson aspak, madje nënqesh nën hundë kur bën "zbulime" të tilla mediatike që largojnë vëmendjen nga thelbi i çështjes!

Kur Kryeministri zgjedh të trajtojë kundërshtarët politikë duke përdorur retorikën e ndasive të vjetra, duke i etiketuar shqiptarët si "Partizanë dhe Ballistë", si "Ne dhe Ata", ky vend jo vetëm dëshmon një regres të rëndë institucional, por rrezikon ta çojë vendin në një pashpresë të kurdisur me kujdes.
Gjuha e urrejtjes dhe e mllefit nuk është thjesht një shpërthim momenti! Ajo është një armë e kalkuluar pushteti. Është strategjia e njohur e përçarjes për të sunduar, një taktikë ku vëmendja publike zhvendoset me dashje nga skandalet grabitëse, papunësia, varfëria dhe dështimet qeverisëse, tek temat e stërkaluara të historisë kombëtare.
Kryeministri, me nënqeshjen e tij cinike, e di mirë se polarizimi është oksigjeni i mbijetesës së tij politike.

Përfshirë edhe EdVer Ramën, këta bijtë, nipërit, apo stërnipërit e morrave të kuq, se kuptojnë ose nuk duan ta kuptojnë, asnjëherë, se më mirë të jesh ballist, zogist, bajraktar, bejler, kulak, bir, nip e stërnip i tyre se sa të kesh etiketën Morr i Kuq - kategoria më e keqe e sojit të morrave dhe horrave! Morrat (Horrat) e Kuq që hanë edhe krenat e njëri -tjetrit vetëm për mbijetesë politike!
Me mirë ballist e bir ballisti, se Morr i Kuq, apo pasardhës i morrave të kuq!
Me logjikën partizanë që vrasin armikun (në fakt më shumë vranë shoqi -shojn) e ballistëve që hanë pula të vjedhura, edhe tani në shekullin 21-të, tregoni veç mjerimin tuaj absolut! Mjerimin tuaj politik, intelektual e njerëzor!
Le të mos krahasojmë "vjedhjen pulave" me grabitjen masive që po i bëhet popullit më të varfër të Europës nga banda e pasardhësve të morrave të kuq!

Kam parë, e kam njohur edhe ndonjë komunist që indoktrinimi nuk mundi t'ia grabisë deri në fund fisnikërinë! Sepse fisnik nuk bëhesh! Fisnik lind, dhe mbetesh i tillë deri në ditën e mbrame!
Por ju jeni ca të pafismë, ca morra të kuq (ishit të zinj fillimisht, por u ngopët me gjak), që fisnikëria nuk iu ka kaluar kurrë pranë! Sepse kam parë , kam jetuar, kam pasë, e kam miqësi, edhe me njerëz të varfër nga ana pasunore, por me një shpirt fisnik që ju nuk e ëndërroni!
Nganjëherë është më mirë të heshtni se të këputni broçkulla!
 
Shënim: Kam diçka të fundit për të gjithë ata që shpesh hyjnë në profilin tim, apo në shkrimet e mija, dhe kërkojnë të më fyejnë, të më kërcënojnë, apo të më japin leksione demokracie: Merrni mundimin të lexoni deri në fund atë që kam shkruar, dhe mos harroni ilaçet përpara se të shkruani! Shëndeti në radhë të parë!

Qentë e tërbuar do të shqyejnë njëri -tjetrin! nga Nga E. Kaceli

Një skenar i frikshëm zbatohet prej kohësh në filmin tronditës të grabitjes së zonave më piktoreske nga Veriu në Jug të Shqipërisë!
Regjia është e përsosur dhe e menduar në mënyrën më kriminale deri në detaje!
Një strategji e mirëfilltë e përqëndruar te grabitja e tokave private dhe pasurive publike! Pa asnjë dallim! Një grabitje e mirfilltë, sistematike.
Analogjia është e hidhur, por thelbi mbetet që po e shqyejnë këtë vend krejt si qentë e tërbuar që kafshojnë një pjesë çfarëdo në trupin e njeriut dhe ikin! Pa e shqyer krejt njëherësh njeriun e shkretë!
Dallimi i vetëm është se po i zgjedhin me shumë kujdes e dashuri pjesët që shqyejnë, duke zgjedhur perlat e territorit! Dhe duke i veshur me emra te mëdhenj si: Investitorë strategjikë (strategjikët shqiptarë zënë vendin e parë), investime amerikane, investime sheikësh, investime shumëkombëshe, paketa e maleve (përfshirë edhe fushat) paketa e këtij, paketa e atij... Transparenca Zero!
E gjithë kjo grabitje bëhet ditën për diell! Policia e shtetit mbron Investitorin dhe Policinë Private; Policia Private dhunon protestuesit; Shteti, nëpërmjet prokurorisë dënon dhjetëra protestues, e disa policë të thjeshtë. Shteti bën sikur shkarkon drejtues policie... Një skemë trashanike por që funksionon sistematikisht!

E bukura është se gjithë kjo grabitje ndjek skemën e shmangies së një reagimi masiv popullor. Një metodologji e sistematizuar. Asgjë e rastësishme!
Strategjia është e thjeshtë, por efikase për ata që e zbatojnë:
Copëtimi i protestave deri në lodhjen, sfilitjen e atyre që iu grabitet pasuria!
Nuk sulmohet gjithçka përnjëherë. Zgjidhet një objektiv: një copë tokë në Astir, një port në Durrës, një copë mal në Theth, një ndërhyrje në Rrjoll, apo një tjetër në bregdetin e Vlorës...
Duke vepruar me "grabitje pjesore" qeveria (që natyrisht është miratuesja, mbrojtësja dhe zbatuesja e kësaj strategjie grabitjet) siguron që të përballet vetëm me një grup të kufizuar qytetarësh.
Kur preket një lagje në Tiranë, zëri ngrihet vetëm aty dhe mbytet aty!
Kur fadromat mbërrijnë në Theth,  grabitet Thethi, proteston vetëm Thethi.! Kur betonizohet Rrjodhi, çështja është vetëm e një grupi familjarësh nga Rrjodhi të cilët në dorë mbajnë vetëm letrat e pronësisë, të lagura nga shiu, ndërsa pronën iua zhvillon Strategjiku nën mbrotjen 24 orëshe të policisë së shtetit!
Kur merren peng e tërhiqen zvarrë vlonjatët e Zvërnecit të tjerët fërkojnë duart! "Kjo nuk ka të bëjë me mua".

Historia përsëritet . Strategjia e njëjtë përdoret cikël pas cikli.
Ndërkohë që qytetarët e një zone të caktuar lodhen duke protestuar të vetmuar, makineria e pushtetit, dhe lukunisë së investitorëve strategjikë ka kaluar tashmë te "kafshata" tjetër! Përvojat e hidhura, nga veriu në jug, tregojnë se heshtja e atyre që nuk janë prekur ende nuk është mbrojtje; ajo është thjesht një shtyrje në kohë e radhës së tyre për t'u përballur me të njëjtën fatkeqësi.
Nëse historia na mëson diçka, është se strategjia e "kafsho dhe ik" funksionon vetëm për sa kohë që reagimi mbetet lokal. Grabitja e pronës nuk është çështje e një fshati apo e një lagjeje, apo e një grup familjesh të revoltuara,  por një proces që po ndryshon strukturën sociale dhe ekonomike të vendit. Derisa qytetarët të kuptojnë se e nesërmja mund t'i gjejë ata në pozicionin e atyre që sot po protestojnë të vetmuar, "kafshatat" do të vazhdojnë të merren, një nga një, pa ndërprerje.

Dhe kur te shqyejne tokat dhe territorin e Shqipërise e të mos ju mbetet gjë tjetër do të fillojnë, ose kanë filluar të shqyejnë njëri -tjetrin! (aeroporti i Vlorës, investimi në Butrint, e ndonë rast tejtër, janë shëmbujt e parë)

Kjo përputhet me një ligjësi të njohur historike dhe sociale: kur burimet mbarojnë dhe grabitja arrin në pikën e fundit të moskthimit, konflikti zhvendoset nga "grabitësi ndaj qytetarit" në "grabitësi ndaj grabitësit".

Kur nuk ka më hapësirë për t'u zgjeruar dhe toka është konsumuar, ata që e kanë ndërtuar pushtetin e tyre mbi përvetësimin do të detyrohen të kthehen kundër njëri-tjetrit për investimet e tyre! Ky është fundi i pashmangshëm i çdo sistemi që ushqehet me shfrytëzimin e pakontrolluar:
"Kafshatat" mbarojnë, oreksi për pushtet dhe grabitje nuk shuhet. Ndarja e territorit që dikur bashkonte interesat e një grupi të caktuar, kthehet në mollën e sherrit që i përçan ata. Shënon fundin e besnikërisë ndaj njëri -tjetrit!
Në një sistem të bazuar te grabitja, besnikëria ekziston vetëm për sa kohë ka "pré" për t'u ndarë. Sapo burimet pakësohen, aleatët e djeshëm bëhen rivalët e sotëm, duke nisur kështu një proces vetë-shkatërrimi.
Kjo luftë për mbijetesë mes grupeve të pushtetit shpesh përfundon duke e lënë vendin të shkretë, jo vetëm fizikisht (përmes betonizimit dhe tjetërsimit të tokës), por edhe institucionalisht, pasi shteti, i përlyer deri në fyt, shndërrohet në një arenë lufte ku interesi personal mbizotëron mbi gjithçka.
Në fund, ajo që mbetet është një hartë e shqyer, jo vetëm nga ndërtimet, por edhe nga dëmi social që shkaktohet kur ligji dhe morali zëvendësohen nga lufta e ashpër brenda llojit, nga ligji i xhunglës!

E. Kaceli, Itali

Surrealizmi dhe fati i individit, në shoqëritë globaliste, në poezinë e Edmond Kaçeli-t.

Nga Emi Krosi

Poezia dhe pse, po jeton kohët më të vështira, ajo e gjen udhën deri tek lexuesit e saj besnikë. Lexuesit, në kohë reale falë edhe rrjeteve sociale, janë të njohura me stilet dhe mënyrat e shkrimit, por vetë poetët luajnë me një ndjeshmëri të rafinuar, duke prodhuar shumëllojshmëri por edhe kompleksitet në krijimtari. Brenda këtij kompleksi, ndërveprimi midis imagjinatës krijuese dhe kushteve socio-shoqërore, hapsira dhe koha në të cilat operon autori, është burimi i shumicës së formave të vështirësive, ku konceptohet sesi poezia/poema, të jetë një entitet autonom (Sim: 1998: 12). Ndonjëherë duket se imagjinata duhet të shkëputet nga kufizimet e së kaluarës, duke hedhur poshtë mitet e konsumuara nga koha, qasja ndaj së kaluarës dhe ndaj "realitetit", të dyja këto përfundimisht, vendosin një simbolikë postmoderne. Poezia nuk është një çlirim i emocioneve, por një arratisje nga emocionet; nuk është shprehje e personalitetit, por një arratisje nga personaliteti. Por, sigurisht, vetëm ata që kanë personalitet dhe emocione e dinë se çfarë do të thotë të duash të arratisesh nga këto gjëra, ndërsa “pacifikimi i poezisë” dhe “çmobilizimi i poetit”, përbëjnë edhe karakterin antimoralist të poezisë (Steiner: 2001: 213), që është përgjithësisht e supozuar të jetë e vetëkuptueshme, pasi poeti nuk ka ndonjë “strategji konvervatore”, për puritanizmin (pastërtinë) e poezisë së tij. Jo gjithmonë ndodh kështu.

Disa poetë kritikohen për dis/harmoninë apo për “ftohtësinë” e vargjeve dhe moskombinimin e fjalëve siç në “Skllevër të hiçit” (Kaçeli: 2026). Libri poetik hapet me poemën “Këpuca e vjetër” përmes vargjeve: o këpucë e vjetër sa mosha/shoje grimë prej kalldrëmit të viteve /vazhdon të ecësh nëpër udhë të panjohura /këpucë e shpirtit tim -arnuar me dhimbje..., (2026: 7), një sfidë e qëllimshme ndaj lexuesit. Pse e qëllimshme? Sepse autori i drejtohet këpucës, si veshje e gjymtyrëve të poshtme: këmbëve. Ngjizja simbolike e antroplogjisë njerëzore, d.m.th këmbëve (që nuk përmenden fare) por janë vetëm imazh i ecjeve/udhëtimeve,  pra jeta njerëzore, është udhë…udhë..udhëtim pafund. Ecja nëpër shtigjet e vështira të jetës, me këpucët e grisuar dhe të arnuara, sepse autori ka “kryqin” e fatit mbi kurriz, pra ka përvëjon e jetës: ai ka JETUAR, por libri mbyllet me poemën prej 19 pjesëshe  “Haluçinacionet e të veshurit me rrobën e ushtarit”.

Por vetë poezia sendërtohet mbi receptimin:

a)     receptimi i realitetit të njeriut të harruar dhe braktisur, në vargjet: në shtëpinë e babës nuk hyjnë më njerëz/ Vetëm trishtimi, dy pleq -hije malli/dy trasta ilaçesh gjith’farëlloj/dhe shpresa shpresa për videothirrjen e radhës! (2026: 38) me shënimin: [Itali, mars 2020] braktisja është një dhimbje dhe farsë e çmendur. Nuk është as imagjinatë/trillim/rrëfim poetik, por realitet i dhimbshëm, dy pleq, dy hije, dy trasta me ilaçe dhe pritje pafund…vetë vargjet kërthasin/ulërijnë/bërtasin/thirrmojnë/dhembin/vajtojnë për lëngatën e vetmisë dhe braktisjen e vendit në çdo cep, në çdo fshat, qytezë dhe qytet. Më shumë ikin se kthehen. Dhe kur kthehen, arroganca e shtetit të tyre “rivret”, “rikthen”, “rivendos” në udhëkthimet ashtu si klithmaja dhe brimta e realitetit krejt gri në poezinë; “Nevojë për besim”, përmes vargjeve: nëse punët nuk shkojnë mirë në vendin tim, dhe Qeveria thotë se kjo nuk është e vërtetë! /Qeveria ka të drejtë./Nëse vriten njerëz rrugëve të qytetit tim/ dhe zëdhënësi qeveritar mohon ç’ka pane/30 mijë sytë e qytetit tim/Qeveria ka të drejtë./Por…Nëse në shtëpinë time ka ndodhur diçka e keqe/ (Për shembull jam zënë me gruan,/për shpenzimet e muajit) /dhe testimet zyrtare thonë se familjet shqiptare/janë në lumturi të plotë/Unë dhe gruaja duhet të shtrëngojmë dhëmbët,/ dhe ti japim të drejtë Qeverisë./ Pasi Qeveria është ajo që ka të drejtë… (2026 : 23), ku ironia dhe neveria bashkohen bashkë. Vetë përsëritja e tofjalëshit:[qeveria ka të drejtë], na rrëfen sesa tragjike është një vend ku shteti i lë qytetarët në mëshirë të fatit.

     b)    Receptimi mbi gjendjen surreale; (eksplorimi i pavetëdijes si një formë e vërtetë e realitetit) ku pavetëdija do të thotë të hysh në kujtimet e shtypura, frikërat tona themelore të pashpjegueshme dhe ta shndërrosh atë potencial në diçka krijuese. Surrealistët, u intriguan prej pavetëdijes dhe irracionales (Breton: 1992: 87), se surrealistët ishin një koleksion shkrimtarësh, që ishin po aq të interesuar të depërtonin në nivelet e përvojës sonë të vetëdijshme sa edhe në depërtimin në shtresat e ekspertizës sonë racionale. Ata mbanin qëndrimin se mendja e pavetëdijshme, që na formëson kryesisht identitetin tonë ndaj padrejtësive politike dhe historike.

c)     Receptimi i situatave të absurdit, (poezia e absurdit, është një poezi e errët, plot ankth, tmerre, frikë, vetmi, që poetët e guximshëm në çdo kohë i rikthehen makthit të kohës ku jetojnë). Pranimi i vetmisë, është e vetmja gjë që i ka mbetur artistit, përmes obsesionit, ankthit dhe zhgënjimit, se është ndjenja e fajit që njeriu përjeton (Beckett: 1986:48). Në këtë rrymë, poetë që iu qasen absurdit, kishin probleme me shoqërinë ku jetonin. Koha e “mbarsur” me trazira, me frikë dhe trauma kolektive dhe sociale, zëzohet fuqishëm përmes protestës individuale kundër përditësisë, si revoltë e brendshme. Ashtu si ekzistenca njerëzore, por edhe bota është në vetëvete një absurd, si konflikt, që vjen nga përballja e të dyve që e lind atë. Nga njëra anë ekziston dëshira njerëzore për ta kuptuar botën në tërësi, për ta njohur atë me të gjitha kuptimet dhe nga vlerat njerëzore, ndërsa nga ana tjetër, kjo dështirë njerëzore është penguar, pasi bota është tipike rezistente, ndaj të gjitha formave të kuptueshmërisë (Camus: 1991:24), ashtu si në vargjet: qeshi dhe unë me krahasimin absurd/me trishtimin tim abdsurd,/të marrë,/të çmendur të rrallë (2026:30).

     d)    Receptimi postmodern, (filozofi postmoderne, [Jean-François Lyotard], e konsideron këtë fenomen, si reduktim të dukurive specifike, në një rend artificial i të vërtetave universale, tipike për të menduarit modern), ku varësia e njeriut modern, është fakti i çrregullimeve të ideve, në kuptimin më global, “për të organizuar masën e ngjarjeve që vijnë”, nga bota njerëzore dhe jo-njerëzore, duke iu referuar gjenezës së historisë universale të njerëzimit. Perceptueshmëria poetike, përmes ndikimit dhe fuqisë imagjinative, që eksploron kufijtë e kohës, ku në krijime të caktuara, imazhet e absurdit plotësojnë fjalët, ndonjëherë pothuajse duke zëvendësuar ato krejt, ku poetika vetëprojektohet si imazhe mendimesh (Eco: 1984:28) në vargjet: në fillin e hollë tragjik të moskuptimit/në pezullin e brishtë mes ikjes dhe qëndrimit/në ëndërrën dhe zhgjëndërrën e filozofisë jetike/ në dilemën e jetës shpirtërore a fizike (2026: 73). Në sipërfaqe, moderniteti dhe postmoderniteti duken pole të ndara, sepse e para pranon autoritetin qendror të një subjekti njerëzor, si metanarrativën, bashkë me parimet gjithëpërfshirëse si edhe nocioni i të vërtetës, ku realiteti fizik plotëson virtualen, me shumë probleme të gjuhës dhe përfaqësimit të traditës moderne perëndimore, që janë në marrëdhënie të kontrollit dhe lidhjes mes fjalës dhe shkrimit (Derrida: 1997: 255), ashtu si vetëm poezia dhe poeti që vetëshkatërron imazhin e shpirtit njerzor të thërrmuar nga modernizmi (jo si term letrar dhe filozofik), por si dëshirë dhe model jetese.

    e)     receptimi përmes ironisë/ satirës dhe sarkazmës /paradoksit ironia dhe superrealja janë parime postmoderniste, ku stimulimet zëvendësojnë të vërteten, ku kuptimi mbi të vërtetën ndërmjetësohet nga stimulimet e së vërtetës (Dado:2020:129), pra realiteti shqiptar i sotëm stimulohet përmes ironisë, në vargjet: pshurrët e shkërdhyet/ mandatet e popullit/ trimat e Partisë/ Ju Heronjtë e Gopit!/Por ju jeni burra/ këngë iu thur’ populli /“Trimat i merr topi/ meshkujt i ha Gopi!” (2026: 115) nga poezia “Heronjtë e gopit”, me nëntitullin [satirë], si elemente dhe të menduarit, në raportet e poezisë me realitetin, kemi një përmbysje të realitet dhe shtrembërimim të tekstit (Gross: 2011:146), duke sendërtuar një realitet të djeshëm dhe hipër/realitetin e sotëm të Shqipërisë.

     f)   receptimi i klithmës/ulërimës/bërtimës socio-shoqërore, ku këlthitja, thirrma e brutalitetit, ergërsisë, poshtërimit të njeriut si person dhe njeriut socio-shoqëror, që fati e përplas nëpër sintomat e ankthit që kurrë nuk mbarojnë. Qenia dhe Asgjëja/Hiçi si gjendje të pakuptimta, ashtu si dhe ekzistenca e njeriut absurd, nuk gjejnë shumë justifikime të jashtme, për situatat e tyre. Varësia e njeriut modern, është fakti i çrregullimeve të ideve, në kuptimin më global, “për të organizuar masën e ngjarjeve që vijnë”, nga bota njerëzore dhe jo/njerëzore, duke iu referuar gjenezës së historisë universale të njerëzimit. Megjithatë, duke qenë se universi është i ftohtë dhe indiferent ndaj kërkimit të kuptimit të esencës njerëzore, ne gjithmonë do të përballemi me situata absurde, ku përpjekjet tona për të gjetur kuptimin dështojnë, për më tepër, izolimi dhe tjetërsimi i përkasin edhe gjendjes njerëzore (Perloff:1990: 18), nëpërmjet vargjeve: në Qytetin e Vogël sundojnë/ Zyrtarët Shpirtxhuxhë/ Zyrtarët vogëlakë, /trutharë,/barkaliqë /zyrtarët me kollaret e lidhura trashë/ Zyrtarët, që , për hir të modernizmit,/shpërlajnë/ Fytyrat e duhanta me parfume grashë./E zyrave shëtisin Minifundet e sekretareve/ Minifundet zgjedhëse të ngjyrës së kollareve/ Kështu bindet populli (i lumtur) se shtetarët/ Nuk janë kurrsesi impotentë ndaj grave/ E gratë e shkreta, gratë e pafaj,/në orarin zyrtar, në krahë dashnorësh/ shkrihen në vaj…(2026: 110), nga poezia: “Qyteti i vogël”. …”. Këndvështrimi i autorit, spotanisht apo qëllimisht, trajton tema të forta thellësisht sociale dhe tronditëse, ku përditshmëria, ankthi, përjetimet, shqetësimet, normalja dhe jo/normalja, realja dhe jorealja, absurdi dhe neveria, vinë përmes poezisë ku ashpërsia e realiteti ulëret fuqishëm. Shumë poezi, janë aq “të ftohta”, saqë vetë njeriu është një vetmi që ndien ftohtësinë e realitetit modern globalist, të zvetënimit të njeriut të “vogël” dhe të “tepërt”.

    g)    Receptimi stilistiko - gjuhësor; zakonisht gjuha e poezisë post/moderniste është e  “pashpirtshme”, e “pandjeshme” e “rrëmujshme”, por autori e ka ndërtuar gjuhën e tij si një pasuri fjalëformimi, ku vetëm me fjalën [zero], ka formuar një çerdhe fjalëformimesh si;

-       fjala zero = [zero+njeriu, zero+grade zero + shpirti, zero +herë, zero + ditë, zero

+plagë, zero +gjak, zero + shpirtë]. Nuk mungon dhe gegnishtja e folur e zonës që ndeshet mes vargjeve duke i dhënë një tjetër melodi vargut, si p.sh:  me bâ të gjitha mëkatet që si bâna kurrë qysh se leva, fmì, e der sa u bana burrë/E me u bâ hì!

-       fjala mjegull = [mjegull + mjegulluar + mjegullime + të mjegullta + mjegulle + mjegullnajë + mjegulli], duke treguar një pasuri leksiko-gjuhësore dhe stilistike.

-       Fjalëformimet: xhamkrisur/ shpërlarë/përgjatë/marrëdhënie /fatkeqësi/ filogjenezë/ sapolindur/ kësisoj/ përditshëm/ përdreq/askundit/ përgjaki/ njëmijë/ udhëkryq/ përjetshme/ pangjyrë/ moskohë/ moskthim/ fatkeqësi / përgjithshme/ bregdetit/frymëmarrjen/ përkëdheljen/ pashpresë/ mirëpaguara /këmbëkryq /asgjë /mosqenia /udhëkryq /katërqind /zëdhënësi/ programatik/papërsëritshëm/shpirtçmendur/ trupçmendur /shumëngjyrëshe /gjithëfarlloji/ videothirrjen/ gjysëm i kryqëzuar/ paçlirë/ paanë/ brimtarësh/ çakorduar/ gurndjellës/ mosqenies/tejskaj/ mosfatit/atmosferë/ përvitshme /fundviti/gjithkah/ hijerëndë/ përjashta/ mespërmes/ parrugë/ përgjakun/ grykëndryshkur/ gojëtharë/ çatishpuar/ kurrkushit/ moskamjes/ moskuptimit/ përplasur/ nëpërkëmbur/ përjargen/peshërëndë/ stërmundimeve/ paralajmëruar/ rrugëdalje/pabesa/ stërvjetër/hijerënda/ papremë/atëbotë/ vendnumëro/ shpirtmira/ shpirtzeza/ tiktaku/ përbindëshash/ fundjetë/ mbijetuar/shpirtxhuxhë/trutharë/ minifundet/lulëkuqet/ buzëplasur/hijerëndë/jashtëzakonshëm/ kryengritës /mbërtheckat /pasagjerë/mosthaniesh/ mjekërbardhë /krishtlindje /pulëbardhat/ shtypshkronje/fundmarsi/pesëqind/përbuzur/nëpërkëmbur/rrugëqëndrimet/përkryhen/urdhërthyesit/përgjakin/përbaltin/vetëveten/njëqind/zeronjeriu/zerogradë/zeroshpirti/zeroherë/ zeroditë zeroplagë /zerogjak /zeroshpirtë/ mangnetofonë/ jashtëmode/ barometri/ përnatshëm/ ëndërrvrarë/ gjashtëkëndëshat/ hakmerren/ gjithëpushtetshmit/ ndërgalaktikore/ nëntëdhjetë.

Fjalë kyçe:  këpucë /shoje  /rërë /kripur /ora /deti/ mbytur /dallëndyshe /pranvera /flamur /lidhje rrugë/qen/absurd/ngjyra/qiell/erë/atdheu/hiçi/kryqëzim.

Fjalë katërshe dhe treshe me vizë në mes: njeriu -këpucë- boks -derri/kupë -mall -helmi/mallkim -kupë -mallë.

Enumeracion: lidhi, shpoi, përgjaki/ frymëmarrjen, fjalën, shijen e gjuhës, puthjen, përkëdheljen.../ çohemi, hamë, dhjesim, flejmë prapë/ përplasur, nëpërkëmbur, rrëmbyer, marrosur.

Fjalë me ngarkesë metaforike: në të çarat e shpirtit kripa mbjell ndryshk/ e zemra e qiellit fillon të pikojë gjak/ ngjyrën e përgjakun të vjeshtës.../ lotët e shiut krijojnë mijëra figura/pulëbardhat ngjyejnë krahët/ mjegull jeshile /shpirtna të zhytur në mjegulli.

 Plastikë lulesh...

plastikë dritash...

plastikë fjalësh...                                                    përsëritje + reçitencat    

plastikë urimesh...

Plastikë njerëzish gjithashtu...

Neologjizmat: brimtarësh / vogëlakë.

Sëfundmi: tashmë nuk mund të bëjmë sugjerime, kur dihet patetizmi me të cilën rekomandimet rreth/për leximin janë të kota. Libri, ka nevojë të flejë. Por, poezia është akoma zgjuar përmes këtyre vargjeve:   

Fragment i një poezie të pashkruar…

 Në ëndërra lindim

prej ëndërrash vijmë

rritemi me ëndërra

...dhe vdesim duke ëndërruar

 

Itali, prill 2024

    BIBLIOGRAFIA:

     1.      Beckett, Samuel (1986). The Complete Dramatic Work. London: Faber and Faber.

2.      Breton, André. (1992):  Excerpt from the First Manifesto of Surrealism in Art in Theory 1900 1990: An Anthology of Changing Ideas. Charles Harrison & Paul Wood, eds. Oxford: Blackwell Publishers.

3.      Camus, Albert. (1991): The Myth of Sisyphus and Other Essays. translated by Justin O’Brien. New York: Vintage Books.

4.      Derrida, Jacque.  (1997): Of Grammatology, The John Hopkins University Press: Baltimore.

5.      Eco, Umberto. (1984): The Role of the Reader. Bloomington.

6.      Gross, Piegay Nathalie. (2011): Poetika e intertekstualitetit, “Parnas”, Prishtinë.

7.      Kaçeli, Edmond: (2026): Skllevër të hiçit, “Fishta”, Lezhë. Perloff, Marjorie. (1990):  Poetic License. Essays on Modernist and Postmodernist Lyric. Evanston.

8.      Sim, Stuart. (1998): The Icon Critical Dictionary of Postmodern Thought. Cambridge

9.      Steiner, George. (2001): Grammars of Creation. London: Faber

Emi Krosi 

Maj, 2026.

Kur të nisem në rrugëtimin e fundit nga E. Kaceli

Imazh krijuar me IA nga Kaceli

 

Kushtim: Zanës

Kur të nisem në rrugëtimin e fundit
mos u mundo me më ndalë
veç më përqafo edhe ì herë
(si gjith'herë)
m'uro: Rrugëtim të mbarë!
 
Mos më lyp në lotin kur fillon me t'pikua
m'kujto buzëqeshjen e mbrame
Lëshoje trishtimin, mos i rri peng
kam me kenë jetë
n'hapat e tu të përditshëm
nuk asht fundi
thjeshtë një ndryshim pa shmang
Kam me u ba frymë
Kam me u tretë n'erë...
 
Ma lësho dorën mos më mundo
pa asnjë peng kam me u kthye në shpi
Në atë udhën e mbrame ku heshtja bâhet kangë
unë do të pres! Mos u ngut!
Kam me të pritë n'përjetsi.
 
E nëse dhimbja ka me t'ra heshtë në zemër
kujtoju se nuk âsht lamtumirë
mos më lyp n'vorbullim të erës
Jam bâ pluhun. Preke erën
si me kenë tu prekë shpirtin tem
Mos u ngut, se ka me ardhë dita
me u pa atje ku koha âsht pa fillesë, pa fund,
pa vargoj të ndryshkun premtimesh boshe...
 
Kur të nisem për rrugëtimin e fundit
mos u mundo me më ndalë
veç më përqafo edhe ì herë
(si gjith'herë)
m'uro: Rrugëtim të mbarë!
 
Maj 2026, Itali

Nga Shënkolli në zemër të Legnanos: Rrugëtimi i Aleks Vulajt, kandidati që synon të përfaqësojë zërin e emigrantëve

Shkruan E. Kaceli, Itali

LEGNANO, Itali – Historia e emigracionit shqiptar në Itali është e mbushur me sakrifica, integrim dhe, tashmë, me një dëshirë në rritje për të kontribuar aktivisht në jetën publike të vendit pritës. Një shembull konkret i këtij rrugëtimi është ai i Aleks Vulajt.
Aleksi, pas dy dekadash jetese në Legnano, ka vendosur të kandidojë për këshilltar komunal në listën "Fare Centro con Radice", në mbështetje të kryebashkiakut aktual Lorenzo Radice.
 
Një lidhje që nis në vitin 1992
Për Vulajn, dashuria për kulturën italiane, dhe Italinë,  nuk lindi në brigjet e Adriatikut gjatë eksodeve të mëdha, por në vendlindjen e tij, në Shënkoll të Lezhës. Ishte viti 1992, (vetëm 16 vjeç), kur misionarët e parë italianë u vendosën në zonën e Bregut të Matit, duke sjellë jo vetëm ndihma, por edhe një model të ri edukimi dhe humanizmi për një popull që sapo kishte dalë nga kthetrat e një komunizmi të egër.
Ky takim i hershëm hodhi themelet e formimit të tij njerëzor dhe profesional, duke krijuar një urë lidhëse që do të përcaktonte të ardhmen e tij.
 
Legnano: Shtëpia e zgjedhur
Prej gati 20 vitesh, Aleks Vulaj është pjesë organike e qytetit të Legnanos. Ky qytet lombard me rreth 61 mijë banorë, mbi 1.200 janë shtetas shqiptarë, është vendi ku ai zgjodhi të ndërtonte familjen e tij. Gjatë këtyre viteve, ai nuk ka qenë thjesht një vëzhgues, por një aktor aktiv në botën e vullnetarizmit dhe shoqatave, duke u bërë shpesh pikë referimi për bashkatdhetarët në nevojë.
"Legnano më ka dhënë shumë më tepër seç mendohet," shprehet Aleksi, duke nënvizuar se angazhimi i tij politik vjen si një rrjedhojë natyrale e viteve të tëra pune në terren.
 
Sfida politike dhe integrimi real
Kandidatura e Vulajt vjen në një moment kyç për qytetin, i cili nën administrimin e Lorenzo Radice -s është shndërruar në një "kantier të hapur" zhvillimi. Për Vulajn, politika nuk është propagandë, por shërbim. Ai kritikon ashpër sloganet boshe si "t'i ndihmojmë në shtëpitë e tyre", duke i cilësuar si retorikë boshe, që nuk ka sjellë kurrë ndihmë konkrete. Përkundrazi, beson te projektet e binjakëzimit dhe te bashkëpunimi i ndërsjellë midis Italisë dhe Shqipërisë, projekte të cilat tashmë kanë nisur të marrin formë.
 
Një urë lidhëse për komunitetin
Ajo që e dallon angazhimin e tij është njohja e thellë e problematikave të përditshme: nga vështirësitë me dokumentacionin dhe papunësinë, deri te sfidat shëndetësore. Përmes kontakteve të tij të vazhdueshme me famullinë e Shënkollit duke qenë mjaft aktiv edhe në rrjetet sociale, Vulaj ka asistuar për shumë familje bashkëatdhetarësh, duke dëshmuar se integrimi kalon përmes solidaritetit njerëzor përpara se të kalojë te vota.
Sot, ai u bën thirrje bashkatdhetarëve të tij që të bëhen pjesë e procesit demokratik. Sipas tij, pasja e një përfaqësuesi shqiptar në komunën e Legnanos nuk është vetëm një çështje krenarie kombëtare, por një domosdoshmëri për të siguruar që askush të mos mbetet pas.
Pavarësisht rezultatit të zgjedhjeve, historia e Aleks Vulajt mbetet një nga qindra dëshmitë e fuqishme të transformimit të emigrantit në një qytetar aktiv, i gatshëm për të punuar për të mirën e përbashkët të komunitetit ku jeton.

Paradoksi i Gegnishtes: Mes Elitës Letrare dhe "Gegnishtes së Katundit" nga E. Kaceli

Gegnishtja sot po jeton një lloj dualiteti sa magjepsës, aq edhe melankolik. Nga njëra anë qëndron gegnishtja letrare, e papërsëritshme, e Fishtës, Mjedës, Gurakuqit, Migjenit, Camajt, e Koliqit etj. -një arkitekturë gjuhësore monumentale dhe precize. Nga ana tjetër, është realiteti i përditshëm: një mozaik mijërangjyrësh, ku "gegnishtja e katundit" mbizotëron mbi normën e kultivuar.

Miti i 100 Shkrimtarëve
Gegnishten, letrare, zyrtare, e flet pak kush, e shkruajnë, korrekt, veç nja 100 vetë (prapë m’duken shumë!) tjerët flasin e shkruajnë gegnishten e katundit të vet!
Mbase edhe ky numër duket bujar! Kjo 100 që dinë ta shkruajnë gegnishten letrare në mënyrë korrekte, nuk është thjesht një provokim. Është një diagnozë e ftohtë e realitetit tonë kulturor. Pas vitit 1972, gegnishtja e kultivuar mbeti jashtë institucioneve, duke u shndërruar gradualisht në një lloj "latinishteje shqiptare" me ndryshimin se latinishtja quhet "gjuhë e vdekur" ndërsa gegnishtja u shëndrrua në: "gjuhë e vrarë, e burgosur, e arrestuar!"
Kush e përdorte merrte emërtimin: Reaksionar i Gjuhës Shqipe!

Saktësia vs. Improvizimi: Gegnishtja letrare kërkon një disiplinë gramatikore (paskajoren, trajtat e shkurtra, lakimet specifike) që nuk mësohet më në shkolla! Gjuha ka rregullat sintaksore, morfologjike, gramatike, fonetike, fonologjike, leksikologjike, semantike, pragmtike (gjuha në veprimin e përditshëm)- terma që tingëllojnë të huaja për gegnishtasit e katundit!
Pa këto baza, shkrimi kthehet në improvizim.

Fragmentizimi: Pa një rregullator qendror, gjuha gege po atomizohet! (po rrudhoset, pluhuroset)! Kush nuk e zotëron normën letrare, përfundon duke shkruar ashtu siç flet në rrethin e tij të ngushtë, duke i bartur tiparet e gjuhës së lagjes apo fshatit direkt në letër.

Kur "Katundi" zë vendin e Librit
Forca e gegnishtes ka qenë gjithmonë te gjallëria e saj, poetika, fjalëformimi i pafund, muzikaliteti, por dobësia e saj sot qëndron te mungesa e unitetit! Kur secili përdor fonetikën dhe leksikun e zonës së vet, gjuha humbet fuqinë e saj për të qenë universale.
Shumë shkrues të Veriut, shkruajnë fiks siç flasin vetë në sofrën familjare! Kjo don me thanë se kufizojnë, pa dashje, dritaren e komunikimit vetëm me ata që të rrethojnë!
Krijohet kështu një lloj barriere e padukshme, por e dëmshme: Gegnishtja Letrare dikur ishte një urë që lidhte krejt Veriun dhe trojet shqiptare, ndërsa "gegnishtja e katundit" rrezikon të mbetet një rreth i mbyllur.

Një Rezistencë Kulturore
Rreziku nuk është se gegnishtja do të zhduket si e folur! Ajo jehon fuqishëm në rrugë, muzikë, folklor, dhe shtëpi. Rreziku i vërtetë është humbja e fisnikërisë së saj akademike! Tash 35 vjet e këtej nuk ka pasë asnjë përpjekje serioze për të krjuar të paktën një gramatikë minimale të gegnishtes letrare! Pa këtë gjitha diskutimet janë krejt boshe! Njohësit e paktë të gegnishtes letrare (gjuhë zyrtare deri në vitin 1972) duhet të kishin organizuar të paktën një mbledhje për këtë!
Të shkruash saktë në gegnishte sot nuk është thjesht çështje dëshire; është një akt rezistence intelektuale. Ata "100 veta" që e mbajnë gjallë normën korrekte janë rojet e fundit të një katedraleje gjuhësore që, për pjesën tjetër, po kthehet dalëngadalë në një rrënojë të bukur, por të pashfrytëzueshme.
Mungesa e gegnishtes në Altarin e Gjuhës Shqipe është krejt e pajustifikueshme, dhe jashtëzakonisht e dëmshme!
Humbja e kohës vetëm zgjat agoninë e një pasurie të jashtëzakonshme kombëtare që po e mbysim të gjithë nga pak!

Lezha kthehet në kryeqytetin e fotografisë! nga E. Kaceli

Pamje e Lezhës nga Laguna (Photo E. Kaceli)

Organizohet i pari Festival Mbarëkombëtar i Jetës së Egër dhe Natyrës 

LEZHË – Më datat 18 dhe 19 Prill, qyteti i Lezhës do të jetë qendra e një aktiviteti unik që bën bashkë artin, natyrën dhe turizmin.
Bashkia e Lezhës organizon të parin Festival Mbarëkombëtar të Fotografisë, një nismë që synon të kthejë fokusin e publikut dhe turistëve drejt pasurive të jashtëzakonshme natyrore të kësaj zone.
Ky aktivitet dy-ditor do të mirëpresë rreth 35 fotografë të apasionuar nga Shqipëria, Kosova dhe Maqedonia e Veriut. Nisma vjen si një bashkëpunim i ngushtë mes Drejtorisë së Turizmit në Bashkinë Lezhë dhe një grupi fotografësh nga Kosova, të specializuar në zhanrin “Wildlife” (jeta e egër).

Një vizion që tejkalon përmasat lokale

Projekti vjen si vazhdimësi e politikave të Bashkisë Lezhë për promovimin e kulturës dhe turizmit. Bashkia e Lezhës, e kryesuar nga kryetari i saj, Pjerin Ndreu, është e shquar tashmë për krijimin, mbështetjen dhe zhvillimin e aktiviteteve të tilla kulturore dhe artistike, promovuese që i kalojnë përmasat lokale. Nën këtë lidership, Lezha po pozicionohet çdo ditë e më shumë si një qendër e rëndësishme e eventeve me impakt mbarëkombëtar, duke e kthyer qytetin në një udhëkryq të vlerave artistike dhe zhvillimit turistik.

Një lidhje simbolike mes fotografëve shqiptarë
Përzgjedhja e Lezhës për këtë festival nuk është e rastësishme. Koordinatori i aktivitetit, fotografi i njohur nga Prizreni, Liridon Shala, e lidh këtë nismë me peshën historike të qytetit:
"Lezha është vendi ku u lidhën shqiptarët në 2 Marsin e Vitit 1444, aty ku filloi gjithçka për mbrojtjen e Kombit, në një kohë kur kombi rrezikohej të zhdukej
Ky festival bashkues shënon një lloj lidhjeje të re, njëlloj Kuvendi mes fotografëve shqiptarë, një bashkim përmes artit për të dokumentuar bukuritë tona, ku Lezha është e rrallë në bukuritë e saja!"
Drejtori i Turizmit në Bashkinë Lezhë, Renaldo Xhanej, thekson se "ky aktivitet është një mjet i fuqishëm për promovimin e potencialeve turistike, duke u fokusuar në zonën e Kune-Vainit, ku ndërthuren peizazhet e virgjëra me një biodiversitet të mahnitshëm!"
Xhanej shton se aktiviteti mund të shtrihet edhe në vitet e ardhshme!

Programi: Nga terreni te ekspozita e hapur
Aktiviteti është konceptuar në dy faza kryesore:
Dita e Parë – Eksplorimi: Fotografët do të zbresin në terren për të kapur momente autentike nga jeta e egër, shpendët ujorë dhe peizazhet ku drita natyrore e bregdetit krijon kompozime unike.
Dita e Dytë – Ekspozita: Fotografitë më të bukura të realizuara do të printohen dhe do të ekspozohen në kavaleta në një ambient të hapur, duke i ofruar publikut një vështrim artistik mbi bukuritë e fshehura të Lezhës.
Ky festival nuk është vetëm një garë estetike, por një ftesë për të rizbuluar natyrën dhe për të promovuar "Turizmin e Gjelbër" përmes fuqisë së imazhit.

Gruaja e Alii-ut poezi nga E. Kaceli

Është e zezë gruaja e Alii -ut
Perlë e errët në gjerdanin e dritës
perlë e zezë -një bukuri e pashoqe
Kur kalon shkallëve, mermeri thërrmohet
nën peshën e shikimeve tona
të gjithë meshkujt e dashurojmë në heshtje
duke i fshehë dëshirën sho -shoqit,
rrëzojmë sytë para grave për ëndrrën e ndaluar
E lutemi në heshtje, pas perdes, natën,
Që Alii të ikë larg! Të tresë fort larg!
Më guximtarët nesh, përtypin mendimin e zi:
"Këput zverkun! Lëre këtu! Vdeksh Alii!"
 
Për ata që nuk e dinë Alii është një i zi, nga Niger
një skulpturë e gjallë ebani, i fortë
me muskuj të lëmuar, e sytë e një toke të largët
N'sa ne qorrohemi prej Perlës,
gratë e pallatit hanë të gjallë Alii-un
bukurinë mashkullore që i len pa frymë!
E njashtu, në errsirën e dhomave, gratë ëndërrojnë:
Shohin në ëndërr që Ajo të zhduket, të humbë (të vdesë!)
bashkë me burrat e tyre lakmitarë!
për të ndejtë vetëm, vetëm ato,
dhe dëshira përvëlonjëse me emrin Alii!